Siglir tar il cuntegn

Exteriur Rapport dal clima cuntradi a Donald Trump

Donald Trump sto sa confruntar cun contestaziuns: Autoritads americanas han publitgà in rapport dal clima che cuntradi a las posiziuns dal president american.

Um ch'emprova da stizzaril fieu.
Legenda: Brischaments en la California: Era ina consequenza dal stgaudament global? (maletg d'archiv). Keystone

13 autoritads americanas han publitgà venderdi in rapport dal clima che cuntradi en pliras parts a las posiziuns da la regenza da president Donald Trump. En quel vegn exprimì cler e net, ch'il stgaudament global saja effectuà per gronda part dad umans. Malgrà il grond cuntrast cun las atgnas posiziuns, n'haja la Chasa alva betg empruvà da bloccar la publicaziun. Quai rapportan pliras medias americanas.

Consequenzas dal stgaudament climatic

En il rapport vegn tranter auter avertì ch'il livel da la mar pudessi crescher fin l'onn 2100 per 2,4 meters. Plinavant vegnan era menziunà ils donns ch'èn capità fin uss en ils Stadis Unids da l'America en consequenza dal stgaudament climatic.

«Igl è extrem probabel ch'il stgaudament global vegn effectuà per gronda part dad umans». Uschia hai num en quest document che cumpiglia 2'000 paginas. Il rapport è vegnì elavurà da tschients scienziads da la regenza e dal mund academic.

Remartgas pli reservadas

Il president american Donald Trump aveva avant sia elecziun sco president american menziunà pliras giadas che la midada dal clima saja ina «invenziun». Pli tard èn sias remartgas lura vegnidas pli intschertas. Trump ha dentant cumenzà a schluccar la politica da clima da ses antecessur Barack Obama. Critica hai dentant era dà per l'annunzia da vulair sortir da la cunvegna dal clima da Paris.

RR novitads 06:00