Siglir tar il cuntegn

Exteriur Rata da murdraretschs a Mexico creschida per 20%

La rata da murdraretschs en il Mexico è danovamain s’augmentada. En l’emprim quartal da quest onn èn 7'667 persunas vegnidas mazzadas,quai èn 20% dapli ch'il medem temp avant in onn, scriva l’uffizi da statistica dal pajais.

Purtret da policists che mettan in vaschè en in auto.
Legenda: La rata da murdraretschs en il Mexico è s'augmentada per 20% cumpareglià cun l'onn avant. Reuters

Las bleras persunas sajan vegnidas sajettadas giu. La gronda part da la violenza vegnia commessa da bandas ch’èn activas en il commerzi cun drogas ed ulteriuras acziuns criminalas.

Sulet il mars èn 2'729 persunas vegnidas assassinadas. Il schaner hai dà 2549 murdraretschs, il favrer 2'389. Cun 25'339 murdraretschs l'onn passà è il 2017 l'onn il pli sanguinus enfin uss.

Dapi il 2006 èn radund 200'000 persunas vegnidas per la vita en connex cun la guerra da drogas a Mexico. Il 2006 ha la regenza cumenzà ina campagna cunter ils cartels da drogas. Critichers fan responsabel quel per l'augment dals murdraretschs.

Il fanadur datti en il Mexico elecziuns regiunalas, dal congress e dal president.

RR novitads 10:00