Siglir tar il cuntegn

Exteriur Ratko Mladic condemnà a vita duranta

Il Tribunal per delinquents da guerra a Den Haag ha condemnà l'anteriur schef dal militar bosniac-serb ad arrest per vita duranta – tranter auter pervi da genocid. Mladic fa dentant recurs cunter questa sentenzia, quai ha annunzià ses figl.

Ratko Mladic durant la pronunzia da la sentenzia.
Legenda: Ratko Mladic durant la pronunzia da la sentenzia. Keystone

Il derschader responsabel Alphons Orie dal Tribunal per delinquents da guerra a Den Haag ha condemnà Ratko Mladic ad arrest per vita duranta pervi da genocid, crim da guerra e crim cunter l'umanitad. Capitads èn quests crims durant la guerra da la Bosnia tranter il 1992 e 1995. Mladic è stà cumandant superiur da las truppas bosniacas-serbas, ch'han il fanadur 1995 chatschà a chantun la zona da protecziun da l'UNO Srebrenica. Silsuenter han quellas mazzà var 8'000 buobs ed umens muslims da la Bosnia.

Accusà sa mussa stinà

Durant la pronunzia da la sentenzia han ins manà Mladic ord la sala, perquai ch'el aveva protestà dad aut. La defensiun aveva gia ordavant pretendì da la dretgira da scursanir la pronunzia da la sentenzia, perquai che Mladic pateschia d'auta pressiun dal sang.

La davosa sentenzia

Ratko Mladic è vegnì arrestà pir il 2011, cura ch'el era en fugia. El è silsuenter vegnì surdà al Tribunal per delinquents da guerra da l'anteriura Jugoslavia a Den Haag. Il process ha durà radund tschintg onns. I sa tracta da l'ultima sentenzia da la dretgira pervi da genocid en l'anteriura Jugoslavia. Suenter 24 onns po la dretgira uschia serrar giu sia lavur sin la fin da l'onn.

RR novitads 14:00