André Gerth sperava ina gronda midada en Germania. 16 onns Angela Merkel e la CDU/CSU a la testa dal pajais sajan avunda. Perquai ha el sperà ch'ils Verds cun Annalena Baerbock daventan la ferma partida. U ch'els vegnan almain uschè ferms ch'i vegnan da furmar la regenza tudestga en ina coaliziun da dus. Cun 14.8% da las vuschs èsi dentant cler che la partida verda vegn mo ad esser part da la regenza en ina coaliziun da trais. Bun saja dentant ch'i è fitg probabel ch'ils Verds vegnan ad esser part da la regenza, manegia André Gerth.
Tge coaliziun giavischa André Gerth?
Suenter il di d'elecziuns èn en discussiun la colaziun d'ampla (SPD, FDP e Verds) e quella da Jamaica (CDU/CSU, FDP e Verds). Quai èn las duas coaliziuns las pli probablas per la nova regenza tudestga. Tenor l'um da 53 onns sajan las finamiras verdas pli simplas da vegnir realisadas sch'i dat la coaliziun d'ampla. Lura giugass la protecziun dal clima ina pli gronda rolla.
Sche la CDU e la FDP èn cun ils Verds en ina coaliziun, sche lura èn ils interess da l'economia memia gronds.
Dentant era las tractativas tranter SPD, FDP ed ils Verds na vegnian betg ad esser simplas. Spezialmain las discussiuns cun la FDP vegnian diras per la partida Verda, manegia il Sursilvan.
André Gerth ha sperà ch'i dat ina gronda midada en il pajais cun las elecziuns da l 2021. Questas grondas midadas na vegnia quai probabel betg a dar. Tuttina fetschia speranza ad el che ils Verds vegnan ad esser part da la nova regenza tudestga. E sche la SPD vegn era ad esser part da la nova regenza, sche lura quinta André Gerth era ch'i dat in svilup sin palancà da scolaziun, da sanadad ed en dumondas socialas.