Exteriur - Reacziuns sin il mazzament da l’ambassadur russ
Suenter che l'ambassadur russ Andrej Karlow è vegnì mazzà ad Ankara ha il president russ Wladimir Putin annunzià da vulair tschertgar ils tirafils. Ins stoppia savair tgi che haja manà il maun da l'assassin.
Tant la Russia sco er la Tirchia han discurrì d'in act da terror e ditg ch'i sa tracti d'ina provocaziun che duai disturbar la relaziun tranter ils dus pajais.
L'ambassadur russ è vegnì sajettà giu da l'avertura d'in'exposiziun d'art. Tenor il minister da l'intern tirc è l'attentader in policist indigen da 22 onns.