Siglir tar il cuntegn
cuntegn

Exteriur Reacziuns sin las attatgas a Nizza

La Frantscha è schoccada suenter l'attatga a Nizza. Politichers da l'entir mund èn spaventads, er en Svizra.

Il di da la festa naziunala franzosa è vegnì terminà cun in attentat en la citad Nizza en il sid da la Frantscha: In camiun è charrà en ina fulla dad umans, 84 persunas èn vegnidas mazzadas.

Johann Schneider-Ammann, iI president da la Confederaziun, è s'annunzià da l’inscunter asiatic-european en la Mongolia.

El ha ditg ch'el è fermamain commuventà. Tals crims sajan «absolutamain inacceptabels». En pli ha Schneider-Ammann accentuà quant impurtant ch'i saja da dar ina perspectiva a persunas giuvnas per che quellas na vegnian betg sclausas da la societad.

Reacziun da l'UE e l'ONU

Donald Tusk, il president dal cussegl da l'Uniun Europeica, condemnescha l'attatga. Ella saja in'attatga sin persunas ch'haja festivà la libertad, la fraternitad e l'agualitad.

Il president dal cussegl da l'UE Donald Tusk.
Legenda: Keystone
Nus stain unids cun ils carstgauns e cun la regenza franzosa en il cumbat cunter violenza e terrorissem.
Autur: Donald Tusk, via Twitterpresident dal cussegl da l'UE

Il schef da la cumissiun da l'UE Jean-Claude Juncker rinforza che la Frantscha possia quintar cun il sustegn da la cumissiun en ses cumbat cunter il terrorissem.

Il Cussegl da segirezza da las Naziuns Unidas ha declerà a las famiglias da las unfrendas sia cumpassiun e condolà a la regenza franzosa. Il cussegl ha numnà l’attatga barbaric e faig.

Reacziun da la Chas'alva / Stadis Unids

Barack Obama, il president dals Stadis Unids da l’America, ha condemnà l’attatga sco sgarschaivla ed offert agid american a la Frantscha.

Il president american Barack Obama.
Legenda: Keystone
Nus stain en solidaritad e partenadi sper la Frantscha, noss allià pli vegl.
Autur: Barack Obamapresident american

Reacziun da la Germania

Angela Merkel, la chanzeliera tudestga, numna l’attatga in «mazzament en massa». La Germania partia la tristezza cun la Frantscha, ha ella ditg a l’inscunter asiatic-european en Mongolia.

Angela Merkel, la chanzeliera tudestga.
Legenda: Keystone
Jau sun persvasa che nus gudagnain il cumbat, malgrà tuttas difficultads.
Autur: Angela Merkelchanzeliera tudestga

Joachim Gauck, il president da la Germania, ha condolà a François Hollande. Gauck discurrà d'in'attatga sin tut il mund liber.

Joachim Gauck, il president tudestg.
Legenda: Keystone
Ils 14 da fanadur … stat per las valurs da la Revoluziun franzosa ch’èn er nossas valurs.
Autur: Joachim Gauckpresident tudestg

Reacziun da la Gronda Britannia

Boris Johnson, il minister da l'exteriur da la Gronda Britannia, è s’annunzià via Twitter. El saja «schoccà e contristà dals eveniments terribels a Nizza e da la sgarschaivla perdita da vita».

Reacziun dal Canada

Justin Trudeau, il primminister canadais, ha exprimì sia solidaritad als Franzos. «Ils Canadais èn schoccads dals schabetgs dad oz a Nizza. Nossa simpatia è tar las unfrendas, nossa solidaritad cun ils Franzos.»

Reacziun da papa Francestg

Papa Francestg, il parsura da la Baselgia catolica.
Legenda: Keystone

Papa Francestg, il parsura da la Baselgia catolica, ha affirmà sia solidaritad cun las unfrendas da l’attatga. Il pontifex haja condemnà «mintg’expressiun d’amoc, odi, terrorissem e mintg’attatga cunter la pasch», uschia il pledader dal Vatican. Il papa haja persequità las «novitads sgarschaivlas» cun «grond quità».

RR novitads 06:00+