Siglir tar il cuntegn

Exteriur Reconstrucziun en il Nepal è bloccada

Diversas organisaziuns d'agid en il Nepal recloman che la regenza na dettia or naginas perscripziuns per la reconstrucziun suenter il terratrembel da l'avrigl passà. Passa 600'000 chasas eran vegnidas destruidas ed almain 9’000 persunas eran mortas.

Ina chasa destruida en il Nepal.
Legenda: In problem tar la reconstrucziun en il Nepal è da chattar forzas da lavur qualifitgadas. Keystone

In coordinatur da l'agid da catastrofas en il Nepal ha ditg ch’i na dettia naginas prescripziuns da bajegiar. La Crusch cotschna, l'Unicef ed autras organisaziuns d'agid s'occupan actualmain cun reparter rauba d'agid e cun construir bajetgs provisorics per famiglias e scolas.

L’enviern vegn, e blers n’èn betg preparads

A medem temp spetga l’enviern. Probablamain possia vegnì cumenzà cun la construcziun da chasas permanentas pir il proxim onn, uschia Matthias Bryneson, il coordinatur da Plan International. Tenor stimaziuns d’Unicef sajan anc radund 400’000 persunas betg preparadas avunda bain per l’enviern.

Il parlament n’ha betg agì

Il parlament dal Nepal saja stà occupà ils ultims mais cun formular ina nova constituziun empè da far urden al lieu da catastrofa. Durant ils cumbats politics n’èsi betg reussì als delegads d’avanzar il plans da reconstrucziun. Fin qua n’ha il parlament betg endrizzà in uffizi spezial per prescriver la construcziun da chasas e per reparter ils daners d’agid.

RR novitads 16:00