Siglir tar il cuntegn

Header

cuntegn

Record da 50 onns Auas grondas a Venezia han chaschunà dus morts

Las auas grondas a Venezia èn vegnidas chaschunadas da ferma plievgia. La notg sin mesemna è l'aua s'auzada sin in livel da record dals ultims 50 onns. En la citad istorica hai gia dà dus morts pervi da quai.

In um da 78 onns è mort perquai ch'el ha survegnì in culp electric. La notg era aua entrada en sia abitaziun ed ha chaschunà il culp. In segund um han ins chattà mort en sia abitaziun, ma qua na vegn anc betg sclaus ch'el è mort pervi da raschuns natiralas.

Scolas èn serradas

En pliras parts da Venezia è l'electricitad crudada or ed er cun la telecommunicaziun hai dà interrupziuns e problems gravants. Scolas e scolettas han las autoritads serrà la mesemna.

Pervi dal ferm vent èn per part navs vegnidas destruidas en ils chanals stretgs da la citad. Bleras gondolas èn vegnidas donnegiadas grevamain. Er cun las colliaziuns dals Vaporetti, ils bus d'aua da Venezia, hai dà grondas difficultads. La guardia da costa ha stuì spendrar bleras persunas da navs u ha stuì gidar las navs.

video
Venezia è sut aua
Or da News-Clip dals 13.11.2019.
laschar ir. Durada: 23 Secundas.

Livel da record

Il burgamester da Venezia Luigi Brugnaro ha dumandà Roma per agid. Las auas grondas sajan ina consequenza da la midada dal clima. Curt avant mesanotg è il livel da l'aua creschì entras il ferm vent sin 187 cm sur il livel da la mar. Quai è il livel il pli aut dapi las inundaziuns devastantas dal 1966. Là era il livel da l'aua creschì sin 194 cm.

L'aura resta ils proxims dis uschia

Per oz na vesi betg ora meglier cun l'aua. Per l'entira Italia èsi previs ch'i duai dar nausch'aura la mesemna. Er tutgada fitg ferm da la mal'aura èn las regiuns en l'Italia dal Sid, Basilicata, Apulia e la Calabria.

Er l'insla da vacanzas renumada Capri patescha. Pervi dal vent ferm è in chantun da la curuna dal clutger dà giu sin la «Piazzetta», la plazza principala a Neapel ch'è enconuschenta tar turists. Intgins tetgs èn vegnids donnegiads. Colliaziuns da navettas tranter Neapel e l'insla èn vegnidas interruttas. Parts da l'insla èn er stadas senza current electric. Er sin la Sicilia hai dà inundaziuns e bovas pli pitschnas.

RR novitads 10:00

Artitgels legids il pli savens