Il parlament svedais ha exprimì la disfidanza al schef da la regenza Stefan Löfven. 181 dals 349 deputads e deputadas en il parlament a Stockholm han vuschà cunter il primminister ch'è dapi il 2014 en uffizi.
Per Löfven restan uss duas pussaivladads: El po sa retrair ensemen cun l'entira regenza u ch'el po proclamar aifer in'emna novas elecziuns. Co el vegn a sa decider è anc avert.
Ils populists da la dretga, ils democrats svedais, avevan la gievgia passada inoltrà ina moziun da disfidanza cunter Löfven. Pliras partidas d'opposiziun sco ils moderats, ils cristiandemocrats e la partida da sanestra avevan sinaquai annunzià da vuschar cunter Löfven.