- Entaifer duas emnas ha l’interpresa privat «Autostrade per l’Italia» temp da cumprovar ch’ella haja fatg sias obligaziuns en connex cun la segirtad.
- Las forzas da salvament na quintan strusch pli da chattar survivents sut las ruinas.
- Las cifras uffizials discurran d’almain 38 persunas mortas.
La regenza talian a Roma fa squitsch sin la societad gestiunaria «Autostrade per l’Italia». Sco il ministeri da traffic ha communitgà duajan las indicaziuns da l’interpresa mussar sche las concessiuns èn ademplidas u betg. Era ha la regenza pretendì da la societad da tetg «Atlantia» da surpigliar ils custs per la reconstrucziun da la punt e dals bajetgs cun donns. «Atlantia» appartegn a la famiglia Benetton.
Anc adina vegn tschertgà
Era la notg passada èn las lavurs cuntinuadas. Pliras 100 persunas han tschertgà suenter survivents ni unfrendas. Las schanzas da chattar persunas anc vivas, saja trais dis suenter la tragedia quasi betg pussaivel, scrivan las autoritads. Il dumber da las unfrendas uffizialas è tar almain 38 morts. Era sajan 15 persunas blessadas, 9 da quellas sajan en in stan critic.
Pliras chasas evacuadas
Ord motivs da segirtad èn 13 chasadas vegnidas evacuadas. 558 persunas han pers lur dachasa, conferma la prefectura da la regiun.
RR novitads 06:00