Siglir tar il cuntegn
Inhalt

Exteriur Relaziuns tranter Pajais Bass e Tirchia sin il banc da prova

A Rotterdam èsi vegnì la notg passada tar cravals suenter ch'ils Pajais Bass avevan scumandà a la ministra da famiglia tirca da visitar l'ambassada tirca per far propaganda da votaziun. Avant avevan las autoritads dals Pajais Bass refusà l'entrada en il pajais al minister da l'exteriur tirc.

Pliras milli persunas han demonstrà avant la represchentanza tirca a Rotterdam.
Legenda: Pliras milli persunas han demonstrà avant la represchentanza tirca a Rotterdam. Keystone

L’impurtant a moda cumpacta:

  • A la ministra da lavur da la Tirchia è vegnì scumandà da far ina visita da propaganda a l'ambassada tirca. La diplomata è vegnida escortada da la polizia fin enavos al cunfin cun la Germania, danunder ch'ella era partida la saira.
  • Avant il consulat tirc da Rotterdam èsi vegni la notg tar confruntaziuns tranter radund 1’000 simpatisants dal president tirc Recep Erdogan e la polizia. Era en las citads da Berlin e Düsseldorf han pliras tschient persunas demonstrà cunter las decisiuns en ils Pajais Bass.
  • En la chapitala tirca Ancara è la represchentanza dlas Pajais Bass, ch’era vegnida serrada giu da forzas da segirtad, vegnida bloccada da plirs 100 demonstrants.

En il eclat davart la visita scumandada da la ministra da famiglia tirca en ils Pajais Bass ha la regenza ad Ankara annunzià cuntramesiras gravantas. Il primminister tirc Binali Yildirim ha communitgà che la resposta vegnia dada sin moda e maniera la pli greva. Vinavant ha el appellà als Tircs che vivan en l'exteriur da restar calms.

Rotterdam grondas protestas

La polizia dals Pajais Bass è intervegnida la notg passada a Rotterdam cunter plirs 1’000 demonstrants per gronda parts tircs. Tenor indicaziuns da la televisiun tirca era cun chauns e cun fists da protecziun.

RR novitads 06:00+