En l'Italia ha la partida socialdemocratica dal primminister Matteo Renzi pers las elecziuns per il burgamester da Venezia. En l'elecziun da tagl ha gudagnà il candidat da la coaliziun "Forza Italia" Luigi Brugnaro cun 53% da las vuschs. Ils democrats perdan uschia Venezia suenter 20 onns.
Il cuntercandidat dals socialdemocrats, il senatur ed anteriur procuratur public Felice Casson ha fatg 46% da las vuschs.
Brugnaro è interprendider ed anteriur schef da la federaziun dals interprendiders venezians. El è il candidat da la partida conservativa dretga "Forza Italia" da l'anteriur primminister Silvio Berlusconi. Brugnaro aveva tematisà en la campagna electorala surtut la creschientscha da l'economia e la problematica cun ils fugitivs.
