Siglir tar il cuntegn
cuntegn

Exteriur Restanzas da punt a Genua vegnan stgarpadas giu

In mez onn suenter che la punt Morandi era sballunada ils 14 d'avust 2018 a Genua, han ussa cumenzà las lavurs per stgarpar giu las restanzas. Quai saja in pass impurtant cun ina gronda valur simbolica, ha ditg il burgamester da la citad taliana.

En in emprim pass duai in toc grond da 36 giadas 18 meters da la via vegnir fatg liber e laschà giun plaun. La demontascha dal toc da radund 900 tonnas duai cuzzar radund otg uras.

La demontascha da la punt da prest 1'200 meters lunghezza duai cuzzar tut en tut radund in mez onn. La part da l'ost da la punt è anc serrada e vegn anc examinada dals investigaders.

Sballunada pervi da construcziun manglusa

Ils 14 d'avust era la punt en la citad da l'Italia dal nord crudada ensemen sin ina lunghezza da radund 200 meters. Blers vehichels eran da viadi ed èn crudads giu da la punt. 43 persunas èn mortas, anc blers auters èn vegnids blessads. Era blers abitants en il conturn avevan stuì bandunar lur chasas.

Experts avevan declerà suenter la sballunda che la punt saja crudada ensemen perquai ch'ella saja stada construida manglus en blers puncts ed ina sballunada saja stada previsibla. La procura publica investighescha cunter 20 persunas ed il gestiunari da l’autostrada.

Punt nova d'in architect renumà

Suenter la demontascha da la punt veglia duai l'architect renumà Renzo Piano construir la nova punt. Tenor indicaziuns da la regenza duai quella vegnir averta l'avrigl dal 2020. Cun custs schazegiads da 200 milliuns euros, è la punt ina da las pli charas da l'entira Europa. L'architect, ch'è sez da Genua haja empermess che la nova punt duai tegnair 1'000 onns.

Il plan da Piano prevesa ina punt construida d'atschal, colurà alb. 43 pitgas da glis duain commemorar a las 43 unfrendas.

RR novitads 16:00