Exteriur - Retards e sgols annullads ad eroports en Germania
Passagiers ch'èn als eroports da Berlin ston quintar che lur sgols han retards. La raschun è ina chauma d'avertiment dal persunal da segirezza ch'ha cumenzà oz glindesdi.
A la chauma che duai cuzzar radund quatter uras ha clamà il sindicat Verdi. Cun far chauma vul il sindicat cuntanscher meglras cundiziuns da lavur. Fin uss na sajan las tractativas davart las tariffas betg stadas fritgaivlas.
Tenor las societads aviaticas èn radund 80 sgols pertutgads da la chauma. Sch'era sgols da la Swiss èn pertutgads, n'è betg enconuschent.
