Siglir tar il cuntegn

Header

cuntegn

Exteriur Rosamunde Pilcher è morta

L'autura da bestseller ha gì cun 94 onns in culp, la dumengia passada. Suenter na saja ella betg pli sa dasdada, ha declerà ses figl.

Dumengia passada haja l'autura gì in culp e na saja suenter betg pli sa dasdada, ha confermà ses figl Robin a la gasetta britannica «The Guardian». La gasetta citescha vinavant il figl che Pilcher saja stada da buna sanadad enfin Nadal. Ma en l'onn nov haja ella survegnì ina bronchitis.

La maistra dals romans d'amur

Cun ses romans è Rosamunde Pilcher stada da ses temp ina da las auturas cun il pli bler success. Propi il success decisiv haja ella gì il 1987 cun «Die Muschelsucher». Ses films èn stads la basa per numerus films che milliuns d'aspectaturs han guardà en la televisiun.

Il pli grond success ha Pilcher gì en las regiuns da lieunga tudestga. D'engraziar è quai probablamain a l'emettur da televisiun ZDF. Els han producì passa 100 films da 90 minutas che sa basan sin istorgias da Pilcher e ch'èn in dals formats da la televisiun tudestga cun il pli grond success.

Vid maisa-cuschina

Las istorgias da Pilcher èn vegnidas creads vid la maisa-cuschina ed èn cumparidas en magazins da dunnas. «Jau n'avess mai cartì che quai possia avair success», ha Pilcher ina giada ditg. Ses ultim roman ha Pilcher scrit il 2000.

Jau hai simplamain scrit istorgias curtas perquai ch'jeu hai charezzà quai.
Autur: Rosamunde Pilcher Autura

Cun cudeschs sco «Wintersonne», «Der Brombeertag» e «Wechselspiel der Liebe» ha ella chaschunà in vair boom da turissem en sia patria Cornwall en la Gronda Britannia. Quai primarmain entras ils films tudestgs ch'èn vegnids fatgs da ses cudeschs en il sid da l'Engalterra.

RR novitads 16:00

Artitgels legids il pli savens