Suenter 12 onns è la sonda spaziala Rosetta crudada sco planisà sin il comet Tschuri, quai ha communitgà la ESA. En il center da controlla a Darmstadt en Germania èn arrivads il venderdi las 13:20 ils ultims signals. Uschia saja la missiun vairamain a fin, ha ditg il schef responsabel da l’ESA.
Tenor l’agentura spaziala europeica ESA ha la sonda circumdà il comet Tschuri gia dapli che dus onns. E la sonda aveva era utensils da mesiraziun da l’universitad da Berna a bord, che han gidà da perscrutar il comet. Dapi la gievgia saira ha il center da controlla lura laschà crudar a moda controllada la sonda vers il comet.
La sonda Rosetta era partida il mars 2004 per perscrutar il comet Tschurjomov-Gerasimenko che vegn numnà curtamain Tschuri. Il comet sa chatta 720 milliuns kilometers davent da la terra.
RR novitads 14:00