En l’elecziun dal venderdi gieva quai per il curs dal pajais. Ruhani stat per avrir il pajais, Raeissi ch’è il primcandidat dal clerus stat per l’isolaziun da quel.
Dals 56,4 milliuns electurs registrads han passa 40 milliuns prendì part a las elecziuns.
Segund temp d’uffizi
En ses segund temp d’uffizi vuless Ruhani cuntinuar sia politica d’avertura dal pajais. Sco success il pli grond da l’um da 68 onns vala la cunvegna d’atom la quala ha manà il schaner 2016 ad in’aboliziun da sancziuns encunter l’Iran. Tut en tut na tschenta Raeissi betg en dumonda questa cunvegnientscha cunquai che quella vegn approvada dal parsura-religius Ayatollah Ali Chameney. Chameney rinfatscha dentant a Ruhani d’avair fatg memia pauc ordlonder.
Ruhani ha supplitgà ils Iranais en il cumbat electoral per dapli temp, per pudair trair a niz meglier la cunvegna d’atom. Ultra da quai ha el empermess in rinforzament dals dretgs dals burgais e dapli libertads culturalas. Ses contrahent conservativ stettia per ina «logica da scumonds» admonescha Ruhani, e quel chapeschia nagut da diplomazia.
Relaziun cun tensiun
Malgrà las concessiuns da l’Iran areguard il program atomar resta la relaziun tranter il pajais ed ils Stadis Unids da l’America ina cun tensiun. Il president Donald Trump ha proclamà la gievgia ulteriuras sancziuns encunter il program da rachetas da l’Iran. La fin d’emna visita Trump l’Arabia Saudita – il rival da l’Iran.
RR novitads 10:00