Il mars ha Nicole Bundi stuì serrar l'hotel pervi dal coronavirus. Enfin la fin da zercladur èn las portas stadas serradas.
Quai è stà cun paucs pleds: catastrofa.
Il cumenzament da fanadur ha la hoteliera oriunda da Surrein en Surselva puspè pudì avrir l'hotel. L’emprim avevi anc paucas reservaziuns. Lura saja dentant vegnì meglier e meglier, els hajan survegnì bleras cudeschaziuns ed il fanadur saja finalmain stà in fitg bun mais. Mez avust hai lura cumenzà, che plirs pajais han mess las Balearas sin la glista da risico, e lura saja puspè ì aval cun las reservaziuns.
Pauc speranza per l’atun
Era per il settember datti mo singulas reservaziuns. Nicole Bundi quinta, ch’i na dettia betg in bun atun. Ella spera, da vegnir sur las rundas cun l'hotel enfin l’enviern, lura è quel adina serrà enfin la primavaira. La speranza è da pudair avrir l’hotel il mars u l’avrigl. Ma la malsegirtad è gronda.
Igl è fitg grev da planisar.
La giuvna hoteliera è engaschada dals possessurs da l'hotel e di, ch’ella haja ina plazza segira. Ma sch’ils possessurs decidessan da serrar l'hotel, lura stuessi ella cumenzar da nov e tschertgar ina nova plazza. E vi da quai na veglia ella gnanc pensar.
