Siglir tar il cuntegn

Header

cuntegn

Exteriur Russia: Attaga sin passants en Sibiria

En il nord da la Russia ha in um attatgà pliras persunas cun in cuntè. Tenor las autoritads na sa tractia betg d’in act da terrorissem.

En la Sibiria hai dà oz in'attatga cun in cuntè – sumeglianta a quella en la Finlanda – set persunas èn vegnidas blessadas. L'um saja currì tras la citad da Surgut ed haja attatgà passants. L'attatgader saja lura vegnì sajettà giu, ha la polizia russa communitgà. I sa tractia d’in um indigen da 23 onns. I vegnia sclerì sche l’um saja gia dà en egl pli baud.

Da las 7 persunas blessadas hajan 2 persunas grevas blessuras, ha declerà la regenza da la regiun. La polizia russa na vesa betg terror sco emprim motiv pussaivel. Las medias localas descrivan però l'attatga a moda differenta e sco pli greva. Tenor quels rapports hajan pliras persunas attatgà passants cun cuntès ed armas.

Entant che la polizia russa na vesa betg terror sco emprim motiv pussaivel, ha la milissa da terror Stadi Islamic annunzià d'esser responsabla per l'attatga. La vardaivladad da quella communicaziun ha dentant anc betg pudì vegnir verifitgada.

Surgut è ina citad passa 2000 km en l’ost da Moscau. La citad ha var 300’000 abitants ed è in center da l’industria d’ieli. Perquai vala Surgut sco ina da las pli ritgas citads da la Russia.

RR novitads 14:00

Artitgels legids il pli savens