La Russia ha cuntinuà cun sias attatgas en la Siria. Tenor atgnas indicaziuns haja ella attatgà 40 miras or da l'aria aifer las davosas 24 uras. Quai saja in zic pli pauc ch'ils ultims dis. Il medem mument ha l'armada da la Siria attatgà rebels en la chapitala Damascus. Er ils Stadis Unids han fatg pliras attatgas or da l'aria cunter l'organisaziun terroristica «Stadi Islamic» en la Siria e l'Irac.
Emprimas emprovas da coordinar attatgas
Per evitar ch'ils aviuns russ ed americans collideschian tar las attatgas èn experts militars da la Russia ed ils Stadis Unids en discussiun davart reglas da segirezza per las attatgas or da l'aria. Tenor indicaziuns dal militar american sajan dus aviuns s'avischinads memia fitg sonda passada.
RR novitads 20:00