Exteriur - Russia saja la culpa da las bumbas sternantas explosivs en Siria
La Russia saja responsabla ch'igl è vegnì duvrà bumbas che sternan explosivs en Siria. Quai communitgescha l'organisaziun per dretgs umans «Human Rights Watch».
Dapi il 1.8.2010 è en vigur la convenziun internaziunala encunter muniziun che sterna explosivs. La convenziun era vegnida elavurada ad ina conferenza diplomatica a Dublin il matg 2008 e po vegnir suttascritta dapi lura. Il december 2008 avevan 87 stadis suttascrit ella.
La Svizra ha ratifitgà la convenziun il 2012.
Tenor «Human Rights Watch» (HRW) mussian fotografias che las bumbas scumandadas sajan vegnidas bittadas giu l'emna passada sur in vitg datiers dad Aleppo. Ubain che la Russia sezza haja bittà las bumbas, ubain ch'il pajais haja furnì ellas a l'armada siriana, pretenda HRW.
L'organisaziun per dretgs umans appellescha la Russia e la Siria da sa tegnair vid il scumond internaziunal per talas bumbas. Bleras da questas bumbas che sternan explosivs detuneschan betg immediat - mabain pir bler pli tard. Quatras n'è l'effect destructiv betg controllabel, uschia ch'ins na po betg sclauder unfrendas civilas.
