Siglir tar il cuntegn

Exteriur Russia vul sa retrair da la Curt penala internaziunala a Den Haag

Quai succedia sin ordinaziun dal president Wladimir Putin, ha declerà il ministeri da l'exteriur russ.

Purtret da la curt penala internaziunala.
Legenda: La Curt penala internaziunala a Den Haag. Keystone

La Russia aveva suttascrit il statut l'onn 2000, dentant mai ratifitgà il contract. N'er betg ratifitgà il contract han la China ed ils Stadis Unids enfin uss. Dapi l'onn 2002 intercurescha la Curt penala internaziunala genocids, crims da guerra e crims cunter l'umanitad sin l'entir mund.

Sco argumentaziun hai gì num da la Russia che la curt internaziunala ICC n'adempleschia betg las aspectativas da la cuminanza internaziunala. Moscau ha crititgà co che la curt giaja enturn cun conflicts nua ch'era la Russia saja cumpigliadda. La curt na saja n'er betg independenta ed effizienta.

La schefaccusadra dal ICC aveva declerà dacurt che l'occupaziun da la peninsla Crim entras la Russia ed ils cumbats en l'Ucraina da l'ost sajan in conflict internaziunal tranter la Russia e l'Ucraina.

Putin: «En 14 onns be quatter sentenzias»

Putin crititgescha che l'ICC haja en 14 onns lavur be decidì quatter sentenzias. Tar tut quai haja la curt dentant duvrà passa ina milliarda dollars. Sco exempel ha la Russia era numnà il conflict tranter la Russia e Georgia il 2008. Là saja be vegnids intercurids ils sbagls da las truppas russas. Betg resguardà haja la curt las agressiuns dals georgians cunter civilists en il sid da l'Ossezia. Quai na saja betg independent.

L'ONU admonescha da flaivlentar l'ICC

Er plirs pajais africans hajan gia smanatschà da sortir dal contract. Pervi da l'unda da pajais che vulan sortir ha il cumissari dals dretgs umans appellà da fortifitgar il sustegn per la curt. I na dettia nagina alternativa.

Ina curt flaivla saja in regress per in mund paschaivel e gist ha ditg la schefaccusadra da l'ICC.

RR novitads 18:00