Siglir tar il cuntegn

Header

cuntegn

Sajettim en USA 20 morts tar sajettim en il Texas

Suenter in sajettim en in supermartgà ad El Paso en il stadi federativ Texas, ha la polizia mess a ferm ina persuna suspectada.

Tar in sajettim en la citad da cunfin texana El Paso vegnan almain 20 persunas mazzadas. Ulteriuras 26 sajan vegnidas blessadas. Quai han communitgà las autoritads localas.

In um haja sajettà enturn en in center da cumpra ier enturn las 10:30 temp local (18:30 temp svizzer). La polizia haja arrestà el. I sa tractia dad in giuven da 21 onns. Ordavant haja el publitgà in manifest online. Quai pudess esser in indizi ch’i sa tractia dad in crim dad odi cun in motiv rassistic – suppona la polizia. Ella sclauda ch'i dettia ulteriurs attentaders. La procura publica investighescha en chaussa.

Tar l'attatga saja il center da cumpra stà plain. Tranter 1000 e 3000 persunas sajan stadas preschentas.

Trump condolescha

Il president american Donald Trump ha condemnà il sajettim via Twitter. I sa tractia dad in act faig. I na saja betg pussaivel da giustifitgar il mazzament da persunas innocentas.

Betg l'emprim sajettim cun unfrendas quest'emna

I sa tracta gia dal terz sajettim cun unfrendas entaifer be in emna en ils Stadis Unids. Mardi eran duas persunas vegnidas mazzadas tar in sajettim en il stadi federativ Mississippi. In policist era vegnì blessà.

La dumengia passada aveva in giuven da 19 onns sajettà enturn ad in festival a Gilroy en la California e mazzà trais persunas, tranter auter in uffant da sis onns.

Suenter tals sajettims datti adina puspè discussiuns davart il dretg d'armas. President Trump refusescha però da rinforzar il dretg d'armas.

RR novitads 22:00