Salvà 153 persunas ord gondla bloccada

Fin otg uras han ils turists da skis stuì tegnair la dira en las gondlas da 12 plazs en il sid dal Klein Matterhorn. Curt avant mesanotg era l’evacuaziun lura terminada ed ils ultims giasts deliberads.

Teaser. Avrir maletg en lightbox.

Legenda da maletgs: Ina gondla da las pendicularas Cervino ch'ha plaz per 12 persunas. Cervinia.it

La sonda è ina pendiculara cun tozzels persunas a bord stà fermada en la Val d’Aosta en l’Italia; i gieva in ferm vent. Gist suenter la panna (ca. 15:30) ha cumenzà l’evacuaziun. Enturn las 23:15 era l’ultima da las 153 persunas salvada ord las gondlas nunstgaudadas, sco l’agentura da novitads Ansa rapporta. Tuts passagiers sajan en pe. Ils giasts sajan vegnids accumpagnads a Cervinia dals alpinists salvaders e da commembers da la Guardia di Finanza.

Laschà giu cun suga singul

La pendiculara cun gondlas a 12 plazs era sa fermada pervi d’in defect. Forzas da salvament han durant il suentermezdi transportà material da salvament sut il lieu da la panna. Ils passagiers han lura mintgin singul stuì vegnir laschads giu cun suga. A l’acziun da salvament èn sa participads radund 150 gidanters, tranter auter blers da las pendicularas da Cervino ed alpinists salvaders da la Guardia di Finanza. Er l’Air-Zermatt è stada en acziun cun helicopters, cunzunt per illuminar las gondlas da stgir.

Il territori da skis Breuil-Cervinia Valtournenche Zermatt cumpiglia trais vals en l’Italia e la Svizra, dal Klein Matterhorn (3'883 m.s.m) fin a val a Valtournenche.

Helicopters da la Air-Zermatt illumineschan las gondlas