Il concern da viadi britannic Thomas Cook è concurs. Tut ils sgols sajan stritgads. Quai ha communitgà l’autoritad da sgol britannica. Pertutgads sajan 600’000 turists. Ins cumenzia ussa in’acziun per transportar enavos las persunas che sajan en vacanzas. Quella portia il num «Matterhorn».
Er Neckermann pertutgà
Tar Thomas Cook tutga tranter auter Neckermann Reisen da la Germania ch'è er activ en Svizra. Tenor l'interpresa èn il mument en viadi 140'000 persunas cun ils organisaturs tudestgs da la gruppa. Quantas persunas da la Svizra ch'èn pertutgadas n'è il mument betg cler. Sin la pagina d'internet svizra da Neckermann stat scrit che viadis reservads cun di da partenza davent dad oz na possian betg vegnir garantids.
Condor vul far vinavant
La societad aviatica tudestga per sgols da vacanzas Condor percunter ha scrit ier sin sia pagina d’internet ch’ils aviuns sgolian vinavant. Condor sgola deschinas d’aviuns per Thomas Cook.
Thomas Cook è la pli veglia interpresa da viadi dal mund cun 21’000 collavuraturs en 16 pajais. Ella è vegnida fundada l'onn 1841. Tar l'interpresa tutgan hotels, ressorts da vacanzas, societad aviaticas e cruscheras. Dals 105 aviuns dal concern sgolan 58 per Condor.
L'interpresa aveva ils ultims onns adina puspè da cumbatter cun problems finanzials. Gia il 2012 avevan pliras bancas salvà Thomas Cook.
RR novitads 06:00
