Igl era in project ambizius cun qual ch’il investur ed anteriur minister d’agricultura Miho Svimonishvili ha contactà avant quatter onns il Plantahof. Fundar ina scola d’agricultura en Georgia, tenor il spiert e model da scolaziun svizzer. Dus anteriur magisters dal Plantahof ed in anteriur veterinari chantunal han acceptà la sfida. Curdin Foppa, Carl Brandenburger e Rolf Hanimann han investì numerusas uras cun sviluppar in model da scolaziun, cussegliar l’investur davart la cumpra da terrain e construcziun dals stabiliments ed èn sez stads diversas giadas a Georgia per accumpagnar il project.
L’emprim punct culminant è stà il november 2021 nua che 11 scolaras e scolars da la Georgia han cumenzà la scolaziun da 2 onns.
Chaschiel svizzer en Georgia – in «déjà-vu»
Las scolaras e scolars da la scola na survegnan betg mo ina scolaziun d’agricultura. Era co che producir in chaschiel svizzer fa part da la scolaziun. Perquai è vegnì fabritgà era ina nova chascharia sin l’areal da la scola. In signun Grischun producescha en quella dapi in onn chaschiel da muntogna, tenor receptura svizra. I n'è dentant betg l’emprim chaschiel svizzer «made in Georgia». Gia avant passa 100 onns era la producziun da chaschiel ferm en mauns svizzers. In chapitel istorgia ch'è bunamain ì en emblidanza.
Scola cun internat, chascharia e stalla
Sche la scola duess purtar il pled «Swiss» en il num, sto l’entira purschida era correspunder ad in tschert standard. Ins ha construì ina sort mini-«Plantahof» a Sarkineti, radund trais uras viadi davent da la chapitala Tbilisi. Ina scola cun internat cun plazza per fin 30 scolars, ina stalla cun plazza per 50 vatgas da latg ed ina chascharia moderna per elavurar il latg. Latiers 100 hectaras terren. Prada, pastgiras e champs per cultivar tartuffels ed autras culturas. Stalla e chascharia vegnan manadas dad in signun ed in pur svizzer che èn emigrads en Georgia. Ils scolars pon tras quai lavurar ed emprender sut cundiziuns optimalas.
Tscherts cumpromiss han ins tuttina stuì far per realisar quai. Fabritgar la stalla tenor prescripziuns svizras n’er strusch pussaivel ed era il model da scolaziun han ins adattà per absolver quella entaifer dus onns.
La scolaziun duess però pussibilitar a giuvens purs e puras da la Georgia da pudair manar suenter lur agen manaschi en ina grondezza economica e rentabla.
