Siglir tar il cuntegn

Exteriur Sbassà prognosas economicas avant referendum da «Brexit»

Pervi da la malsegirtad davart la sortida da l’UE ha la Gronda Britannia sbassà sias prognosas economicas. L’associaziun economica CBI quinta mo pli cun in creschament da mintgamai 2% per quest e l’auter onn.

In broker davos dus visurs, sur el in muster da puncts che mussa vers engiu.
Legenda: Las prognosas èn sa sbassadas, ed il futur economic è actualmain intschert en la Gronda Britannia. Reuters

Anc il favrer era l’associaziun economica da l’opiniun che l’economia creschia il 2016 per 2,3% respectivamain per 2,1% l’auter onn. L’augment economic da l’entir mund saja actualmain intschert, ha ditg la directura da la CBI. Pervi dal resultat intschert dal referendum dals 23 da zercladur spetgian las interpresas da far investiziuns.

Recessiun en cas da Brexit

Gia avant aveva er la Bank of England sbassà sias prognosas – sin 2% per il 2016 e sin 2,3% per il 2017. La banca naziunala ha avertì che la creschientscha economica pudess vegnir pli plauna en il cas ch’ils Brits sa decidian d’extrar da l’UE. Tar in Brexit pudess quai er dar ina curta recessiun, ha declerà la Bank of England.

RR novitads 11:00