En in plant collectiv pretendan ils accusaders ch'il concern-mamma da Facebook, Meta, haja violà las leschas da la protecziun da la vita privata dad els. Quai en il connex cun il scandal da Cambridge Analytica. Meta ha uss acceptà in accumodament avant la dretgira a San Francisco.
Il concern-mamma da Facebook paja 725 milliuns francs, na conceda dentant betg d'avair violà la lescha da protecziun da datas. Cambridge Analytica aveva rimnà datas sur da radund 80 milliuns persunas sin Facebook senza il consentiment da quels.
Quai saja il pli grond pajament pervia dad in plant collectiv, en connex cun protecziun da datas privatas, dian advocats dals accusaders. Els renfatschan a Facebook e ses concern-mamma d'avair violà la lescha da la protecziun da la vita privata.
Cambridge Analytica ed il cumbat electoral en il Stadis Unids
Il scandal enturn Cambridge Analytica ha er gì ina dimensiun politica. L'interpresa haja duvrà infurmaziuns da profils da Facebook per coordinar il cumbat electoral da Donald Trump cunter Hillary Clinton il 2016.
