Siglir tar il cuntegn
Inhalt

Exteriur «Sch'jau fiss Tudestg, fiss jau aderent da Merkel»

Temp da dar adia: Il president american partent Barack Obama è arrivà per si’ultima visita a Berlin. El e la scheffa da la regenza Angela Merkel èn silsuenter s’exprimids a moda positiva davart la collavuraziun dals ultims otg onns. Obama è sa mussà sco fan da Merkel.

Barack Obama ed Angela Merkel.
Legenda: Barack Obama ha engrazià ad Angela Merkel per la buna collavuraziun tranter la Germania ed ils Stadis Unids. Keystone

Il president american partent Barack Obama è sin tura da cumià tras l’Europa – actualmain en Germania. Là è el il suentermezdi s’entupà cun la chanceliera Angela Merkel. Omadus han silsuenter fatg ina bilantscha positiva da lur collavuraziun dals ultims otg onns.

Partenari fidaivel

Obama saja in partenari fidaivel, quai er durant temps pli grevs, ha ditg Merkel. Ella ha engrazià per otg onns collavuraziun stretga, plain confidenza ed amicabla. Er durant grevs temps – Merkel ha manegià l’affera da spiunadi da la NSA – haja quai dà ina collavuraziun fidaivla cun Obama.

Fan da Merkel

Obama è sa mussà sco fan da Merkel. Sin la dumonda schebain ella duaja ils proxims onns anc ina giada candidar sco chanceliera n’ha el betg respundì directamain. El ha dentant undrà Merkel sco politicra excellenta. «Sch’jau fiss Tudestg, fiss jau aderent da Merkel», ha el ditg. I saja dentant chaussa da Merkel da decider, sche’ella veglia anc ina giada candidar per ina votaziun dal Bundestag. E la finala saja quai chaussa dal pievel tudestg fixar la direcziun da ses pajais.

Sustegn cunter SI e per TTIP

Obama ha engrazià a la Germania per ses sustegn en il cumbat cunter la gruppa da terror Stadi Islamic. Vinavant ha Obama numna l’Uniun europeica ina da las pli grondas prestaziuns dal mund.

Angela Merkel ha ditg ch’ella speria che la cunvegna da commerzi liber TTIP vegnia tuttina realisada, il futur president american Donald Trump ha stedi crititgà talas cunvegnas da commerzi liber.

RR novitads 20:00

«Jau vi ir a l’Oktoberfest»

Barack Obama vul sco um privat visitar l’Oktoberfest a Minca. «Insaco hai jau manchentà quai fin uss», ha el ditg. «Mo forsa èsi meglier sch’jau fasch quai sco ex-president – lura hai jau dapli plaschair». La stad 2015 aveva il president american a l’ur d’in inscunter G7 gia gì contact cun la cultura bavaraisa.