Siglir tar il cuntegn

Header

Legenda: Sebastian Kurz, il chancelier austriac. Keystone
cuntegn

Schallenberg vegn engirà Crisa guvernamentala en Austria a fin

Il president da l’Austria Alexander van der Bellen ha declerà che la crisa guvernamentala en ses pajais saja a fin. El vegnia a saramentar il nov chancelier, Alexander Schallenberg, il glindesdi ha il president da la republica austriaca ditg la dumengia. Da las duas partidas che regian, pia la ÖVP ed ils Verds, pretenda van der Bellen da lavurar concentrà.

audio
Per tadlar curt e cumpact: Alexander van der Bellen
00:12 min, RTR Audio dals 11.10.2021.
laschar ir. Durada: 00:12 minutas.

Las renfatschas encunter sia persuna sajan faussas ed el possia er sclerir quellas, aveva Kurz declerà sonda saira avant las medias. Damai ch'il partenari da coaliziun sa posiziuneschia dentant cleramain encunter el, sa chattia l'Austria en ina situaziun da patt.

En questa situaziun fiss quai ord mia vista betg responsabel da surdar la responsabladad per la regenza da coaliziun en in experiment. Tge ch'i dovra è tenor mai stabilitad e responsabladad.
Autur: Sebastian Kurz chancelier da l'Austria

El veglia perquai far plaz, per uschia evitar il caos e garantir la stabilitad. Kurz ha annunzià da sa retrair sco chancelier. El daventia schef da fracziun da la ÖVP en il parlament ed haja proponì Alexander Schallenberg sco successur per il post da chancelier, ha ditg il schef da regenza conservativ.

Il vice-chancelier e schef dals Verds, Werner Kogler ha declerà che la coaliziun restia, el vegnia immediat a manar emprims discurs cun Alexander Schallenberg. L'opposiziun è però s'exprimida a moda critica La scheffa dals NEOS, Beate Meinl-Reisinger, per exempel ha ditg che Kurz tiria uss simplamain ils fils davos las culissas.

Inquisiziuns da corrupziun encunter il chancelier Kurz e ses tschertgel il pli stretg han chaschunà ina crisa da regenza en Austria. Ils Verds sco partenari da coaliziun èn entant da l'avis che Kurz na saja betg pli abel da reger. Mardi che vegn avess Kurz stuì sa confruntar cun in votum da disfidanza en ina sesida extraordinaria. Ch'el vegnia elegì giu era gia tant sco segir.

RTR novitads 20:00

Artitgels legids il pli savens

Scrollar a sanestra Scrollar a dretga