Siglir tar il cuntegn
Inhalt

Exteriur Schef da gasetta critica en Tirchia en arrest d'inquisiziun

Tschintg dis suenter si'arrestaziun è vegnì decidì in arrest d'inquisiziun cunter il schefredactur da la gasetta «Cumhuriyet». Sco motiv vegn numnà il suspect da terrorissem.

Purtret da la gasetta tirca.
Legenda: La gasetta tirca «Cumhuriyet» è fitg critica visavi la regenza tirca. Keystone

Ina dretgira haja decretà l'arrest d'inquisiziun cunter il schefredactur Murat Sabuncu ed otg ulteriurs collavuraturs da la gasetta critica vers la regenza, quai rapporta l'agentura da novitads statala Anadolu.

Glindesdi èn ils lavurers da la gasetta vegnids arrestads. La giustia reproscha ad els d'avair lioms tar rebels curds sco era tar ils responsabels dal putsch malgartegià mez fanadur. L'arrestaziun è vegnida crititgada fermamain da vart internaziunala.

Il venderdi èn era ils schefs da la partida HPD vegnids arrestads en la metropola da Diyarbakir. Tenor indicaziuns da la partida vegnia investigà cunter almain nov da lur deputads. Tar razzias èn almain 12 deputads vegnids arrestads. La HPD ha ditg ch'i saja da quintar cun anc dapliras arrestaziuns. Erdogan accusescha la partida d'esser gidantra da la partida curda scumandada PKK.

Bainbaud protestas en Germania

Suenter las pli novas arrestaziuns en la Tirchia avertescha la cuminanza tirca en la Germania da conflicts averts tranter ils Tircs che vivan en la Germania. Il president Recep Tayyip Erdogan emprovia cun tutta pussanza da far escalar la situaziun en la Tirchia. Quai haja er consequenzas per la vita en la Germania, ha ditg il president da la cuminanza tirca en la Germania. I saja da quintar cun numerusas demonstraziuns en citads tudestgas. El ha appelà als Tircs tudestgs da restar calm e da betg sa laschar provocar.

RR novitads 09:00