Quai scriva l'agentura da novitads taliana Ansa. Schettino n'è betg stà preschent avant dretgira. L'um da 55 onns è il sulet accusà.
Il schaner 2012 è il bastiment collidà cun in grip avant la costa taliana a Giglio ed ha fatg naufragi. Tar la disgrazia èn mortas 32 persunas. La dretgira ha declerà culpant Schettino tranter auter pervi da mazzament ord negligientscha en plirs cas e ch'el ha bandunà pli baud il bastiment. Schettino aveva bandunà la Costa Concordia en ina bartga da salvament, malgrà ch'i era anc persunas a bord.
La defensiun aveva pledà per in acquittament (Freispruch). Schettino po anc ina giada far recurs cunter la decisiun. El po trair vinavant il cas avant la Dretgira da cassaziun a Roma, la pli auta dretgira en l'Italia.
RR novitads 22:00