Siglir tar il cuntegn

Exteriur Scumond da burcas en il Tschad

Il Tschad scumonda a partir d'immediat da purtar la burca. La regenza dal pajais per gronda part muslim reagescha cun quai sin dus attentats da suicidi en la citad principala N'Djamena.

Ina dunna che porta ina burca.
Legenda: Malgrà ch’il Tschad è in pajais muslim, è il purtar burca per dunnas là plitost nunusità. Reuters

Il primminister dal Tschad, Kalzeubet Pahimi Deubet, ha declerà ch'i saja scumandà da purtar burcas a partir d'immediat. Il scumond n’è betg mo valaivel en scolas e lieus publics, mabain en l’entir pajais.

Spirituals e polizists duain far valair il scumond

Il schef da la regenza ha d’ina vart appellà ils spirituals da derasar il messadi en moscheas ed auters lieus d’uraziun. Da l’autra vart duai era la polizia rinforzar il scumond. Ella rimni las burcas e brischi ellas. Tgi che cuntrafetschia a quest scumond vegni arrestà e punì, ha declerà Deubet.

Tschad accusa gruppa Boko Haram dal mazzament

L'impuls per il scumond da burcas èn stads ils dus attentats da suicidi cunter il post da polizia da N’Djamena l’entschatta da quest’emna. Tar quels èn almain 33 persunas vegnidas mazzadas. Ulteriuras 100 persunas èn vegnidas blessadas. Fin uss n'è nagina gruppa sa declerada responsabla per l’attentat. La regenza dal Tschad ha dentant accusà la milissa d’islamists nigeriana Boko Haram.

RR novitads 09:00