Spicer na saja betg stà d’accord cun questa decisiun da persunal dal president american Donald Trump. Spicer haja ditg a Trump, che l’elecziun da Scaramucci saja «in grond sbagl».
Dispitaivel dapi si'emprima cumparsa
Sean Spicer era dispitaivel dapi sia emprima conferenza da medias per la Chasa Alva sut Trump ils 21 da schaner 2017.
Il di suenter l’introducziun en uffizi da Trump aveva el cumenzà ina charplina intensiva cun schurnalists davart quanta glieud che haja visità la ceremonia. Las fotografias mussavan bler damain persunas sco quai che Sean Spicer pretendeva.
Gia nominà ina successura per Spicer
Il directur da communicaziun Anthony Scaramucci ha gia annunzià a Washington la successura da Sean Spicer. Davent da l'emprim da settember è quai sia substituta Sarah Sanders.
Sean Spicer en il focus da satirichers da tut il mund
Er tar autras cumparsas deva el in egl cun in’interpretaziun tut particulara dals fatgs. Uschia è Spicer vegnì en il focus da satirichers en tut il mund. Tranter dad els era er il magazin da satira american «The Daily Show» che ha reagì cun in’omagi (sut en versiun originala en engl.) en la rait:
Cun Sean Spicer sa retira il medem di in segund pledader da medias dal servetsch per il president american Donald Trump. Curt avant era vegnì enconuschent, ch'il pledader dal team d'advocats da Trump Mark Corallo sa retiria.
RR novitads 20:00