Siglir tar il cuntegn

Exteriur Seehofer smanatscha da sa retrair

Davart la dispita d'asil en Germania vulan las partidas CSU e CDU discutar il glindesdi suentermezdi in'ulteriura giada. A quella chaschun duai er il futur dal schef da la CDU e minister da l'intern Horst Seehofer vegnir discutà.

Horst Seehofer, il minister da l'intern e schef da la CSU.
Legenda: Horst Seehofer, il minister da l'intern e schef da la CSU. Keystone

Suenter che Horst Seehofer, il minister da l'intern e schef da la CSU, ha annunzià ch'el veglia sa retrair dad omadus uffizius, datti uss tuttina in ulteriur discurs cun la CDU davart la dispita d'asil en Germania. Sche la CDU vegn lura encunter a la CSU en la politica d'asil, vul Seehofer reponderar sia demissiun.

Per Seehofer che vul reglas pli severas per acceptar dumondas d'asil, datti trais schliaziuns pussaivlas en la dispita d'asil: L'emprima è che la CSU cedia e saja pronta da suandar il curs da Merkel. La segunda è che Seehofer ordinescha sco minister da l'intern che tscherts requirents d'asil vegnan franads al cunfin - encunter la cunvegna cun l'Uniun europeica. La terza saja ch'el sa retiria sco schef da la partida e sco minister da l'intern.

Cuntrari a Seehofer na vul la chanceliera Angela Merkel betg in agen curs en la politica d'asil per la Germania. Ella vul ina cunvegna europeica.

RR novitads 06:00