Igl è l'emprima giada ch'il senat prenda posiziun en la politica exteriura uschè cler cunter il president american. Trump sez metta en dumonda ch'il prinzi bin Salman è involvì en la mort da Khashoggi e cun quai metta el er en dumonda las investigaziuns da la CIA.
Il servetsch secret da l'exteriur dals Stadis Unids parta dal fatg ch'i saja mez fin fitg segir ch'il prinzi haja ordinà il mazzament dal schurnalist Jamal Khashoggi, ils 2 d'october ad Istanbul.
Trump vul mantegnair relaziun cun Arabia Saudita
Il president american vul mantegnair la buna relaziun cun il pajais dal Proxim Orient. El argumentescha cun las cunvegnas d'armament. Plinavant mainan ils dus pajais ina front communabla cunter ils schiits en l'Iran. Quels sustegnan ils schiits en il Jemen.
Caracter simbolic
La resoluziun dal senat sto anc vegnir approvada da la chasa da represchentants. Ma er lura ha Donald Trump anc la pussaivladad da veto. Quai munta che la resoluziun ha dapli caracter simbolic.
RR novitads 06:00