Tar las elecziuns en la Serbia vesi ora bain per Aleksandar Vucic da restar en uffizi sco president dal pajais. Emprims resultats uffizials duai bain dar pir glindesdi saira – ils instituts da perscrutaziun Ipsos e Cesid quintan però gia ussa cun ina victoria clera dal president actual cun fin 60% da las vuschs, entant che l'opposiziun dal cuntracandidat Zdravko Ponos po quintar cun 17%. Vucic è era gia sa declerà sco grond victur.
Tar las elecziuns per il parlament serb è la partida naziunalistica SNS da Vucic tenor ils instituts cun circa 44% sin plaz in, suandada da la «Parteu Ujedinjeni» cun stgars 13%.
OSCE s'exprima anc puncto regularitad da las elecziuns
Entant ha l'Organisaziun per segirezza e collavuraziun en l'Europa (OSCE) annunzià da prender posiziun en il decurs dal glindesdi puncto regularitad da las elecziuns. Avant avevan plirs politichers da l'opposiziun discurrì dad irregularitads cun dar giu las vuschs. Per l'emprima giada n'han electuras ed electurs serbs ch'abiteschan en il Cosovo betg pudì dar giu lur vusch a chasa – mabain han stuì viagiar en Serbia per eleger. Fin ussa era quai pussaivel cun intermediaziun da la OSCE.
Serbia vesa il Cosovo anc adina sco atgna provinza
Las regenzas serbas e da la republica dal Cosovo n'han però chattà nagina basa communabla per far quai. La Serbia ha refusà contacts cun la regenza dal Cosov, perquai che lez muntassia da renconuscher uffizialmain il Cosovo sco agen stadi. Fin oz n'ha la Serbia betg acceptà l'independenza da sia anteriura provinzia, ch'era sa declerada independenta suenter ina intervenziun da la Nato en la Serbia.