En la Serbia ha la partida da la regenza (SNS) gudagnà las elecziuns parlamentaras anticipadas. Suenter che radund 80% da las vuschs èn dumbradas, vegn la partida dal schef da regenza da Aleksandar Vucic sin radund 50% da las vuschs ed uschia sin 145 dals 250 sezs en il parlament serb. Quai rapporta la gruppa da perscrutaziun electorala «Cesid» a Belgrad.
Vucic ha discurrì d’in grond sustegn per sia politica e d’ina victoria istorica. Sin il segund plaz suonda la partida socialista SPS cun stgars 12% da las vuschs e 33 mandats. La partida dals extrem naziunalists SRS daventa la terz ferma forza cun 8% da las vuschs e 22 mandats.
RR novitads 07:00