L'anteriur schef dals producents d'auto Fiat Chrysler e Ferrari, Sergio Marchionne è mort. Quai ha communitgà Fiat. Suenter cumplicaziuns nunspetgadas tar in'operaziun a Turitg era il stadi da Marchionne sa pegiurà tal'uisa, ch'el ha stuì terminar sia lavur sco schef da Fiat, sco era sco president dal cussegl administrativ da Ferrari.
Fin d'ina èra
Marchionne ha valì sco visiunari dentant era sco dir partenari da contractar per sindicats ed en la furmla 1. Sia mort vegn vesida da blers en Italia sco fin d'ina èra.
Il Talian cun passaport canadais era vegnì il 2004 a la testa da Fiat. Là steva la fatschenta anc curt avant il bancrut. 10 onns pli tard ha Marchionne lura mess fil en guila tar la surpigliada dal rival american Chrysler. Dapi la fusiun l'atun 2014 è la valur da l'aczia creschida per prest 350% e cun quai pli ferm che tar tut tschellas interpresas en la branscha.
Sco pli impurtanta ierta da Marchionne vala la concentraziun sin marcas da nischa. A la fin da sia carriera tar FCA aveva il manager cuntanschì sia ultima gronda finamira – sia fatschenta n'ha nagins daivets pli dapi il zercladur.
Vulì sa retrair fin 2019
Sin la fin dal 2019 aveva Marchionne uschè u uschia vulì sa retrair da ses post tar Fiat. Tar Ferrari n'è dentant stà enconuschent nagut d'ina demissiun. A la testa da Fiat stat uss il schef da la figlia d'autos Jeep, Mike Manley. Nov schef da Ferrari è vegnì Louis Camilleri ch'ha manà avant la firma da tubac Philip Morris.
Sco president da Ferrari ha Marchionne valì en la furmla 1 sco manager che na fa nagins cumpromiss. Dentant è er el stà quel ch'ha puspè manà Ferrari al success. Il team dal pilot Sebastian Vettel aveva el crititgà pliras giadas publicamain.
Lioms en Svizra ed en il Grischun
Marchionne aveva tant cun sias activitads professiunalas sco era privat ina ferma relaziun cun la Svizra. Sia dunna ed ils uffants vivan en la Svizra franzosa. El sez viveva per gronda part a Turin, ses domicil uffizial era dentant a Schindellegi en il chantun Sviz. Ed a Flem passentava Marchionne savens las vacanzas.
En l'economia svizra era Sergio Marchionne era stà fitg activ. Posiziuns autas ha el gì tranter auter tar Alusuisse, l'anteriur concern d'aluminium, e tar il concern per la controlla da rauba SGS. Vitiers è el stà commember da cussegls d'administraziun, uschia tar il concern da chemia Lonza e tar la banca gronda UBS.
RR novitads 12:00