Siglir tar il cuntegn
cuntegn

Exteriur Sgolà suenter memia blers sgols: Minister american sa retira

Tom Price, il minister da sanadad dals Stadis Unids, sa retira da ses uffizi. President Donald Trump haja acceptà sia demissiun, ha communitgà la Chas’alva.

Donald Trump sesa cun ina fatscha indignada en l'Oval Office ed ignorescha a Price che stat suenter el.
Legenda: Critica publica da ses schef – Tom Price en l'uffizi tar ses schef Donald Trump. Keystone

Price aveva fatg lingias grassas cun chars viadis da servetsch cun jets privats – quai sin donn e cust dals pajataglias. Tenor il magazin Politico muntian ils custs per almain 26 sgols da charter a passa 400’000 dollars.

Trump aveva crititgà Price publicamain

Trump aveva perquai crititgà ses minister da sanadad Price publicamain ils ultims dis. Ad interim surpiglia Don Wright, il secretari da stadi dal ministeri da sanadad, la funcziun da Tom Price. Donald Trump aveva pretendì gia cun cumenzar ses uffizi sco president american da vulair setgentar «la palì» a Washington.

Price er en critica pervi dad «Obamacare»

En pli ha Price stuì tegnair nà il chau pervi che Donald Trump n’haja betg savì cupitgar «Obamacare». Da cupitgar il sistem da sanadad da ses antecessur era ina da las finamiras principalas che Donald Trump vuleva realisar en ses presidi.

RR novitads 06:00