Siglir tar il cuntegn

Exteriur Simbabwe ha in nov president: Emmerson Mnangagwa

Il pajais african ha uffizialmain in nov president: Avant pliras 10’000 persunas ha Emmerson Mnangagwa prestà l’engirament. Fin a sia relaschada entras l’anteriur president Robert Mugabe era Mnangagwa stà vicepresident.

Emmerson Mnangagwa vegn saramentà a Harare.
Legenda: Emmerson Mnangagwa vegn saramentà a Harare. Keystone

Il pajais african ha uffizialmain in nov president: Avant pliras 10’000 persunas ha Emmerson Mnangagwa prestà l’engirament. Fin a sia relaschada entras l’anteriur president Robert Mugabe era Mnangagwa stà vice-president.

«Il crocodil» al timun da Simbabwe

Emmerson Mnangagwa (75) ha girà il venderdi dad esser loial envers la republica da Simbabwe e da sa cuntegnair confurm a constituziun ed a las leschas ed er defender quellas.

L’anteriur vicepresident tutga gia dapi onns tar l’elita dal pajais. Tenor ils observaders internaziunals saja el enconuschent sco hardliner, perquai er ses surnum «il crocodil». Mnangagwa duai manar il pajais fin a las elecziuns l’onn proxim.

Mugabe ha da «ruassar ora» durant la saramentaziun

La saramentaziun da Mnangagwa è stada be trais dis suenter che Robert Mugabe (93) aveva sa laschà persvader dal militar, da sia partida, dal parlament e da la populaziun da sa retrair suenter 37 onns da ses uffizi.

Il president nov duai avair garantì «segirezza» a Mugabe, citescha l’agentura da novitads svizra SDA la gasetta statala «The Herald». A la saramentaziun da ses successur n’haja Mugabe betg pudì prender part, scriva la gasetta vinavant. Mugabe haja da «ruassar ora».

RR novitads 12:00