Sindicats pretendan pajais gistas per persunal da viafier

Sindicats da viafier da plirs pajais vulan ch'il persunal da viafier survegnia la paja dal pajais ch'il tren traversa. Il traffic sur ils cunfins na dastgia betg vegnir duvrà per dumping da pajas.

In locomotivist che maina in tren. Bild in Lightbox öffnen.

Legenda da maletgs: Er locomotivists duain survegnir ina paja gista ed adequata a la branscha. Keystone

Cun l'avertura dal tunnel da basa dal Gottard traversia il tren la Svizra en paucas uras, ha ditg Giorgio Tuti dal Sindicat per il persunal da transports SEV. Il sindicat tema ch'i pudess dar in dumping da pajas en il traffic da transit cun quai ch'ils locomotivists en l'Italia ed en la Germania han pajas pli bassas ch'en Svizra.

«  Mo perquai che la plazza da lavur dal locomotivist è mobila na duain betg valair autras cundiziuns da basa che per mastergnants. »

Giorgio Tuti
Sindicat per il persunal da transports

Il persunal da viafier duai almain survegnir la medema paja ch’è usitada aifer la branscha nua che la prestaziun da lavur succeda, pretenda Tuti. La concurrenza duai esser «sco s’auda».

Sustegn da Brüssel

Ils sindicalists han accentuà lur pretaisas cun bloccar mintgamai ina locomotiva a Muttenz (BL) ed a Chiasso (TI) – pia là nua che la Svizra cunfinescha cun l’exteriur. Tuti ha avertì d’ulteriuras bloccadas sche las pretaisas na vegnian betg realisadas.

Ils sindicats da viafier da la Germania, da l’Italia e da la Svizra èn s’unids per pudair far valair lur pretaisas. Latiers vegnan els sustegnids da la secziun da viafier da la federaziun europeica da lavurers da transport a Brüssel.

RR novitads 14:00