Siglir tar il cuntegn

Header

Purtret da papa francestg.
Legenda: Papa Francestg na vul midar nagut vid il celibat. Keystone
cuntegn

Sinoda d'Amazonas Papa Francestg na vul betg schluccar celibat

Papa Francestg na vul betg schluccar il celibat da la baselgia catolica. En ses scriver ch'è vegnì publitgà la mesemna, desista el da prender posiziun en chaussa.

Adina puspè hai dà discussiuns per abolir il celibat pervia da mancanzas da spirituals en la regiun da l'Amazonas. L'october era la conferenza dals uvestgs anc s'exprimida per in'adattaziun dal celibat en la regiun. Davart il celibat avevi dà fermas discussiuns tranter ils conservativs ed ils pli moderns. Il tema ch'è en sasez stà en il center da la sinoda – la destrucziun da l'ambient en la regiun da l'Amazonas – è uschia vegnì spustà enavos.

Papa Francestg na prenda gnanc posiziun davart la debatta dal celibat. El gnanc menziuna il pled en ses scriver. En regiuns perifericas da l'Amazonas pon ins per part far messa be ina giada ad onn, perquai ch'i n'ha betg avunda paders.

Be per ils paders

Francestg ha accentuà ch'ins stoppia chattar ina via per garantir questa purschida. El pledescha d'includer pli ferm laics. Laics possian proclamar il pled da Dieu, possian scolar, organisar lur cuminanza e festivar intgins sacraments. Ma, l'eucaristia e prender penetienza na pon els betg. Quai pon be ils paders far.

Ils uvestgs da l'America latina duain plinavant animar dapli persunas da vegnir paders en la regiun da l'Amazonas empè d'emigrar en ils Stadis Unids.

Nagina ordinaziun da dunnas

Er tar las dunnas n'è papa Francestg betg sa muvì en direcziun d'ordinaziun. Il papa argentin vul bain dapli dunnas en posiziuns autas, dentant duai l'ordinaziun vinavant betg esser pussaivla. L'egliada sin structuras funcziunalas mainia be a l'ipotesa che dunnas en la baselgia valian be insatge sch'ellas possian er vegnir ordinadas. Ma las dunnas prestian lur contribuziun sin lur moda e maniera ed entras quai ch'i dettian vinavant la forza ed amuraivladad da Nossadunna.

Per l'amur da l'amur

A Breil en Grischun ha Marcel Köhle dà si ses post sco pader. Quai per l'amur da l'amur. El è sa decidì per viver a moda averta sia relaziun.

Video
La crusch cun l’amur – Marcel Köhle raquinta da ses dilemma tranter altar ed amur
Or da Cuntrasts dals 28.11.2019.
laschar ir

RTR novitads 16:00

Dapli da Exteriuravrir la Landingpage

Nach links scrollen Nach rechts scrollen