Siglir tar il cuntegn

Header

cuntegn

Exteriur Siria: Attatga sin convoi – Stadis Unids fan responsabel Russia

Suenter che la pausa da cumbat en Siria ha è ida a fin, cuntinueschan ils cumbats puspè cun tutta brutalitad. In convoi cun rauba d'agid è vegnì attatgà ord l'aria. Ils Russ dementeschan quai. Entant ha l'ONU franà tuttas furniziuns da rauba d'agid.

L'attatga sin in convoi d'agid da l'ONU en Siria cun 21 morts è tenor la regenza americana vegnida commessa da dus aviuns da cumbat russ. Quels sa chattavian en l'aria cura ch'il convi saja vegnì attatgà, han declerà funcziunaris da la regenza americana envers l'agentura da novitads Reuters.

Il ministeri da l'exteriur russ ha repetì che la Russia n'haja da far nagut cun l'attatga e declerà ch'i n'haja para gnanc dà in'attatga ord l'aria. Las Naziuns Unidas han per il mument franà tut lur furniziuns d'agid en Siria.

Ban Ki Moon, il secretari general da l'ONU.
Legenda: Ban Ki Moon, il secretari general da l'ONU. Keystone

Ferma critica da Ban Ki Moon

Il secretari general da l'ONU ha crititgà vehementamain plirs stadis commembers per lur agir en la guerra civila sanguinusa en la Siria cun passa 300'000 morts.

Fauturs pussants che pavlian vinavant la maschina da guerra hajan sang vid lur mauns, ha ditg Ban Ki Moon a l'entschatta da la radunanza plenara da l'ONU a New York. En la sala sajan preschent represchentants da regenzas che hajan fatg pussaivel, finanzià, sa participà u schizunt planisà e realisà sez ils delicts d'orrur cunter il pievel sirian.

L'attatga sin in convoi d'agid da l'ONU ha Ban numnà in act disgustus.

RR novitads 06:00 / 17:00

Artitgels legids il pli savens