Dasper il minister da l'exteriur russ Sergej Lawrow e ses collega american John Kerry, vegnan ulteriurs impurtants stadis a trametter lur ministers da l'exteriur a Losanna. Quai ha annunzià la Russia.
USA fa reproschas
La regenza americana ha entant clerifitgà che discurs bilaterals na sajan betg previs. I sa tractia sulettamain d’in inscunter da la gruppa internaziunala da sustegn. La raschun per interrumper ils discurs directs saja che la Russia na saja betg abla da sa tegnair vi da empermischuns.
Ulteriur inscunter a Londra
Vinavant han ils Stadis Unids fatg a savair ch’il minister da l’exteriur Kerry viageschia suenter ils discurs a Losanna la dumengia per in inscunter internaziunal davart la Siria a Londra. Probablamain fan part da l’inscunter plirs ministers da l’exteriur europeics.
Kerry e Lawrow sa stentan
John Kerry e Sergej Lawrow avevan gia negozià mez settember ina pausa da cumbat per l'entira Siria. Dentant mo in'emna pli tard avevan ils cumbats tranter las truppas sirianas ed ils rebels cumenzà da nov.
RR novitads 17:00