Siglir tar il cuntegn

Header

Cedels electorals.
Legenda: Las ultimas elecziuns en Siria èn stadas il matg 2012. Keystone
cuntegn

Exteriur Siria duai eleger in nov president aifer 18 mais

En Siria duai vegnir elegì il pli tard en in onn e mez in nov president ed in nov parlament sut surveglianza da l'ONU, quai ha ditg l'incumbensà spezial da l'ONU, Staffan de Mistura a l'agentura da novitads russa Ria Nowosti.

Las elecziuns stettian sin glista da tractandas da las contractivas da pasch che duain cumenzar glindesdi proxim a Genevra. Als discurs da pasch vul er l'opposiziun siriana prender part. Ins sustegnia las stentas internaziunalas per chattar ina soluziun politica e terminar il sponder sang en la Siria. La finamira da l'opposiziun saja da remplazzar il president Baschar Al-Assad entras ina regenza transitorica.

Partida curda sa participescha per la prima giada a discurs

Questa giada duain er ils Curds seser a la maisa da discurs. Da quest avis è la Russia. Il minister da l'exteriur russ, Sergej Lawrow ha confermà oz sia pretensiun a las Naziuns unidas da betg sclauder la minoritad curda dal process da pasch.

La pli gronda e pli impurtanta partida curda en la Siria, PYD n'è fin ussa betg stada cumpigliada als discurs. Ses bratsch armà, la YPG, controllescha la pli gronda part dal cunfin cun la Tirchia. Ella è il pli impurtant allià dal vest en il cumbat cunter l'organisaziun terroristica Stadi islamic.

La pausa da cumbat che vala dapi ils 27 da favrer, stat sin chommas falombras. Il favrer era stà ina prima runda da discussiun a Genevra.

RR novitads 14:00

sda/cs

Artitgels legì il pli savens

Nach links scrollen Nach rechts scrollen