Experts dal ministeri da defensiun american han avertì, che la milissa terroristica dal Stadi Islamic daventia puspè pli ferma. En la Siria nizzegia la milissa la flaivlezza da las forzas da segirezza indigena, suenter ch'ina maioritad dals schuldads americans èn vegnids retratgs ord il pajais. Quai resorta d'in rapport da l'inspectur general dal Pentagon.
Ils schuldads americans sajan vegnids retratgs, schebain che las forzas da segirtad sustegnidas dals Stadis Unids, hajan fatg cler ch'ellas dovrian dapli trenament ed armaziun per mesiras cunter il terror. Ni las forzas da segirezza en la Siria ni las forzas da segirezza en l’Irak sajan bunas da segirar regiuns, nua che la milissa terroristica Stadi Islamic n’è betg pli activa, hai num en il rapport.
Il president american Donald Trump aveva annunzià l’onn passà d’avair dumagnà la milissa terroristica Stadi Islamic. Silsuenter aveva el ordinà che ina gronda part da schuldads americans returnian en ils Stadis Unids.
RR novitads 06:00