Mintga terz uffant saja naschì durant la guerra en Siria ed enconuschia perquai nagut auter che cumbats, bumbas e sirenas. 2 milliuns dad els survegnian mo malregularmain agid umanitar ed enturn 200milli vivian actualmain en territoris bloccads.Blers uffants vegnian surduvrads sco schuldads.
Intgins dals uffants-schuldads sajan pir 7 onns. Numerusas mattatschas vegnian maridadas baud. Tenor in studi da l'Unicef èn en 1500 uffants vegnids mazzads u rapinads l'onn passà en la Siria.
Nagina scola - nagina perspectiva
In grond problem saja era ch’ils uffants n’hajan nagina perspectiva, ha ditg la pledadra dad Unicef Charlotte Schweizer ad RTR. Surtut perquai che bunamain 3 milliuns uffants en Siria ed en ils pajais vischins n’hajan nagina pussaivladad dad ir a scola.
Pausas da cumbat ed access nun-limità per gidar als uffants
Unicef pretenda perquai che las organisaziuns umanitaras hajan access nun-limità als uffants en Siria e ch’i dettia pausas da cumbat. Be lura possian els sa gidar cun p.ex. aua da baiver, nutriment, virolas per ils uffants, material da scola u cussegliaziuns psichicas.
RR novitads 16:00