Siglir tar il cuntegn

Header

John Kerry e Sergej Lawrow davant in vel blau. Davos John Kerry e vesaivel ina bandiera dals stadis Unids
Legenda: John Kerry e Sergej Lawrow. Keystone
cuntegn

Exteriur Siria: pausa da cumbat davent da glindesdi - rebels d'accord

En la guerra civila en la Siria duai valair davent il glindesdi ina pausa da cumbat. Ils Stadis Unids e la Russia èn sa cunvegnidas ad in plan per realisar quai. Fertant che l'opposiziun siriana è sa mussada sceptica han pliras gruppas da rebels signalisà da vulari resguardar la pauda da cumbat.

La pausa da cumbat duai era fullar via per novs discurs da pasch, ha ditg il minister da l'exteriur american, John Kerry, suenter discurs cun ses collega d'uffizi russ, Sergej Lawrow a Genevra. Lawrow ha declerà che la Russia haja infurmà la regenza siriana davart ils plans, lezza saja d'accord.

Rebels vulan resguardar la pausa da cumbat

Pliras gruppas da rebels han signalisà da vulair resguardar la pausa da cumbat. L'armada siriana libra ha per exempel scrit en ina brev als Stadis Unids ch'ella vegnia a cooperar. Ina da las gruppas da rebels islamisticas las pli grondas Achrar al-Scham percunter ha indirectamain refusà la pausa da cumbat. Questa pausa rinforzassia be la regenza dal president Baschar al-Assad e augmentassia la suffrientscha da la glieud.

Opposiziun è sceptica

L'opposiziun siriana è sceptica envers ils plans per ina pausa da cumbat. Ins stoppia spetgar e guardar sch'il reschim sirian sa tegnia vi da las cunvegnas. Quai ha communitgà l'allianza da l'opposiziun «Coaliziun naziunala siriana». Els na crajan betg al reschim perquai che quel na saja memia savens betg sa tegnì vi d' empermischuns da pausas da cumbat, uschia in commember da l'opposiziun vinavant.

Adina stà per ina pausa da cumbat

L'Iran ha beneventà il plan per ina pausa da cumbat en la Siria. Sco in pledader dal departament da l'exteriur ha ditg è l'Iran gia adina stà per ina pausa da cumbat en la Siria. Quai per dar agid umanitar a la glieud. Ussa duajan tut las varts far attenziun che la milissa terroristica Stadi islamic na profitia betg da la pausa da cumbat per recrutar novas forzas. En la guerra civila siriana sustegna l'Iran la regenza dal president Baschar al-Assad.

Svizra beneventa cunvegna

La regenza svizra beneventa la cunvegna tranter la Russia ed ils Stadis Unids. En in'emprima fasa vegn la cunvegna a simplifitgar da reparter l'agid umanitar en la Siria e mitigiar in zichel la miseria da la populaziun. Quai ha communitgà il departament federal per affars exteriurs svizzer. Ins speria vitiers, che la pausa da cumbat gidia en spezial l'ONU per chattar ina schliaziun en il conflict. La Svizra mettia a disposiziun a l'ONU gia oz ses servetschs, per exempel cun retschaiver las partidas sin ses terren per discurs da pasch.

RR novitads 07:00 ++

SDA/hs/md/ggf

Artitgels legì il pli savens

Nach links scrollen Nach rechts scrollen