-
Bild 1 von 7. Sis persunas èn mortas da quest'attatga. Bildquelle: Reuters.
-
Bild 2 von 7. La polizia è preschenta a Quebec. Bildquelle: Reuters.
-
Bild 3 von 7. La polizia è al lieu cun las forzas spezialas. Bildquelle: Reuters.
-
Bild 4 von 7. Era las medias èn preschentas ma fin uss na datti paucs indicaziuns. Bildquelle: Reuters.
-
Bild 5 von 7. La polizia è al lieu cun blers policists. Bildquelle: Keystone.
-
Bild 6 von 7. La polizia segirescha il lieu er la damaun suenter l'attatga mortala. Bildquelle: Keystone.
-
Bild 7 von 7. Ambulanzas en acziun. Bildquelle: Keystone.
- Probabels terrorists han attatgà ina moschea en la citad da Québec.
- Sis persunas èn mortas e otg persunas blessadas conferma la polizia.
- La polizia ha arrestà duas persunas suspectadas.
- Entant suppona la polizia ch'in dals arrestads è ina perditga e betg in attentader.
Dus attentaders han dumengia saira attatgà il center cultural islamic a Québec e sajettà sin las persunas che fatschevan oraziun. Sis persunas èn mortas. Otg ulteriuras èn vegnidas blessadas. La polizia ha arrestà ils dus attentaders probabels. Durant l'attatga sajan radund 40 persunas stadas en il center.
Attatga terroristica?
Il primminister canadais Justin Trudeau ha discurrì en quest connex dad in'attatga terroristica. Muslims canadais sajan ina part impurtanta da la societad, ha el declerà glindesdi. La fermezza dal Canada saja sia diversitad.
Students a Québec
Ils dus attentaders probabels hajan studegià a l'universitad enconuschenta da Laval a Québec. Quai rapportan medias localas. Tenor las medias saja in dals attentaders oriund dal Maroc. Indicaziuns uffizialas davart ils motivs u la derivanza dals dus umens na datti anc betg.
Gruppas da dretga sa distanzieschan
Suenter l'attatga èn organisaziuns naziunalisticas ed inimias da l'islam sa distanziadas dal delict. Violenza na saja per els nagina schliaziun ha declerà la gruppa «Fédération des Québécois de souche» (FQS). Er l'organisaziun «Atalante Québec» è s'associada cun questa decleraziun. Omaduas gruppas han sentenzià l'attatga e declerà che sulet persunas disturbadas profundamain possian far in tal attentat.
Islamofobia crescha en il pajais
Malgrà ch'il Canada è enconuschent per sia toleranza, dettia adina puspè attatgas cunter indrizs muslims, decleran experts. La moschea pertutgada saja gia vegnida attatgada l'atun passà.
RR novitads 06:00+